私家醫院競爭激烈，醫院高層都要諗計點樣吸引病人。除咗提高臨床醫療質素，好多留院病人都講究膳食，要食得健康又唔悶。浸會醫院最近完成擴建，仲轉埋廚房嘅承包商，推出多款新菜式。醫院噚日喺傳媒聚餐請傳媒試新菜，當中原盅燉海中寶有原隻鮑魚、海參同魚肚，行家都覺得真材實料，見到隻鮑魚仲嘩嘩聲，但八方就覺得鹹咗少少，畀病人應該淡啲吖嘛。個湯售價200至300元，睇嚟主要吸引單人房病人。
換承包商要加價
其他菜式包括湯浸三文魚配橄欖油嫩豆及薯蓉，用低溫烹煮保存肉汁同減少營養流失；而有特色海南雞飯配柚子汁菜絲沙律，用橄欖油代替雞油煮個飯，雞肉無肥肉，八方食完覺得唔錯，三文魚同雞肉好嫩，菜絲沙律減低肥膩感；另一個鹿兒島黑豚肉八方飽得滯無試，但賣相好好。醫院話因為餐廳換咗承包商，食物質素提高咗，份量又大咗，所以價格會貴咗。