內地公佈咗首季GDP增長，近期個市咁旺，港股內資外資齊齊炒，A股亦有大媽大力支持，公佈一個唔符合預期嘅數字，等如自製股災。今時今日，個tone都仲係講緊增長放緩嘅前提下，阿爺無必要自尋煩惱。
睇番今次公佈嘅經濟數據，內地經濟增長放緩唔只係個tone咁簡單。內地首季GDP增長7%，雖然同全年目標一致，不過，從三大產業增長角度嚟睇，就知道情況都幾嚴峻。雖然佔GDP最大比例的第三產業增長高達7.9%，但第二產業增長首次低過GDP增幅，只有6.4%，可見趨勢仍然向下，而非見底向上。
以內地去年三大產業比例嚟睇，第一產業佔9.2%、第二產業佔42.6%、第三產業佔48.2%。雖然內地近年已積極轉型，但第二產業佔比仍然唔細，與美國第三產業佔75%、第二產業佔約20%比較，內地結構性轉型仍需要加把勁。在短期結構改革轉型速度有限之下，第二產業火車頭增速落後，對整體GDP增長影響可想而知。雖然首季數字尚未反映近期多項放寬政策，例如放寬樓市調控政策、減電費之類，但阿爺要保七，似乎都需要再諗下計。
流氓