上月離開無綫主播枱嘅周嘉儀，番咗兩星期新工，喺證券公司做市場拓展部聯席董事，原來佢早有部署，兩年前喺城大讀EMBA，密謀轉跑道，下個月完成最後一個課程，出多次trip去台灣，就畢業喇！原來嘉儀BB做主播時，有熱情粉絲送內衣獻心思，唔知轉型後，仲有冇呢啲「厚禮」收？
嘉儀BB噚日同傳媒會面，今年32歲嘅佢做咗傳媒11年，坐主播枱都8年，兩年前踏入女人三十時，覺得係時候轉方向，「始終幕前未必做得咁耐，喺傳媒咁多年，要試好多嘢都試過晒，覺得好多嘢漸漸變routine」，所以決定搵一份終生事業。
佢話讀EMBA學到好多嘢，上堂成日都要同大公司高層或老闆合作做project，擴闊人際網絡之餘，諗嘢格局比做主播時更大。佢讀嘅課程學費都幾「甘」，每學分萬一蚊，要修40個學分，學費至少都45萬，但有獎學金嘅，專係畀好似嘉儀BB咁非商界出身嘅，最高有50萬㗎！
嘉儀BB透露，好多公司向佢招過手，有啲想佢孭數賣保險，有啲就想佢做in-house嘢，都唔啱BB活潑嘅性格，大讚𠵱家份工好有彈性，容許佢接外面嘅job，做司儀甚至主持節目等，前提係可以推廣到公司喎。
嚇到交上司處理
講番主播生涯，是非嘢BB當然封口唔講啦，但自爆以前遇過熱情粉絲，嚇親巧驚驚！佢話間唔中都有人送花去公司，佢樂意收㗎，但曾經有人送內衣褲包裹，嚇到佢即刻交畀女上司處理，「咁點都好過當面送，或者收到刀刀叉叉嘅」。至於套內衣嘅顏色同款式，BB唔肯透露喇。
李八方
mailto:[email protected]