「喂，你喺邊呀？幫我買張點數卡吖」。呢啲騙徒入侵LINE賬號呃錢個案，同「猜猜我是誰」都係長呃長有，雖然已經通晒天，仍然有人中招。
LINE終於痛定思痛，為香港用戶推出雙重認證功能（圖），防範賬號盜用。
用戶可以喺「設定」選擇雙重認證功能，包括「禁止轉移賬號」、「換機密碼」、「安全提示問題」。
禁止轉移賬號：設定咗之後，當你喺自己手機用緊個賬號，可以防止賬號被轉到另一部使用其他電話號碼嘅手機等。
換機密碼：設定一個密碼喺換機嗰陣用，當有人以其他裝置試圖連接賬號，系統會要求輸入換機密碼。
安全提示問題：建立安全提示問題，如果用戶想轉移賬號，必須答中3條預設問題其中一條。
#4月23日起開始
LINE香港用戶即時可以選用邊種雙重認證功能，但由4月23日開始，用戶就必須喺「禁止轉移賬號」同「安全提示問題」之間揀一項措施，保護賬號。
雖然有啲人裝咗LINE都未必常用，但都應該設定保護賬號，因為如被盜用嚟呃人，往往受騙嘅就係對你最好嘅人，於心何忍呀（問都唔問就買點數卡、過數去你銀行，雖然係豬啲，但咁嘅親戚朋友邊度搵呀）。
＃要生計，也要生活 ＃毋忘初衷
費清