港大民意研究計劃總監鍾庭耀早排推動泛民同建制派搞政改全民投票，由投票結果決定政改投票取向，但兩大陣營都唔多騷佢，搞到鍾庭耀都灰晒，噚日上電台呻成個計劃至今成效不彰，至今冇一個議員答應一齊玩。有泛民中人同花生友話，鍾庭耀作為學者，誠意、熱心真係冇得挑剔，但講到現實政治，「你當泛民儍嘅咩！咁都肯同你玩？」
呢位泛民中人話，當日鍾庭耀話搞政改全民投票，已有泛民私下議論，最多只有泛民玩，建制一定唔肯落水。但鍾庭耀話晒係泛民尊重嘅學者，都唔可以完全冇表示，所以之後泛民同鍾庭耀見咗一次面，算係畀面對方，「其實見之前好多人都預咗唔玩，見唔見冇分別」。
綑綁投票根本冇得贏
雖然鍾庭耀話，既然政改爭議連專家、學者都搞唔掂，將選擇權交畀市民決定係好方法，但該泛民同花生友講，整個計劃盲點在於泛民只會係輸家，根本冇得贏，「大佬，好似你話打四圈牌，邊個最後贏得籌碼多邊個贏，我哋泛民輸牌就要畀籌碼，建制輸牌就話，我冇籌碼畀㗎，啲籌碼喺北京度，北京唔肯畀你我冇辦法㗎！咁打嚟做乜？」
之但係鍾庭耀似乎對民調未死心，佢噚日話唔搞公投，會同其他大學合作搞政改民調，該泛民中人不忘再潑冷水，「做到六成民意支持政府方案，實畀建制用嚟逼泛民轉軚；若然做到六成民意反政府方案，政府、建制扮睇唔到，咁做嚟有乜用？」
花生友