工業界林大輝嘅寸嘴發言，噚日喺預算案辯論令記者精神為之一振。佢話財爺曾俊華早前向陳偉業作狀開槍，係無聊、誇張、幼稚，認為嘥子彈：「對付長毛、陳偉業呢類人士，就算用真槍實彈打佢都係嘥子彈，何況係用有姿勢無實質嘅手槍？」佢話下周拉布戰正式展開，即使鬍鬚曾帶玩具機關槍嚟掃佢哋，相信改變唔到拉布現象，似乎大輝嘅機關槍係掃向拉布議員至真。
大輝同時讚鬍鬚曾呢份預算案歷年最好，搞到佢民望高、受歡迎，反觀特首梁振英不單民望低，仲叫人用選票踢走拉布議員：「市民未必聽佢嘅呼籲，因為好多人都想踢走特首、多過想踢走長毛或者大嚿。」