曼聯上場4:2大勝曼城，唔經唔覺英超連贏六場。雖然佢哋先輸一球，但係由艾舒利楊格、費蘭尼、桑馬達同基斯史摩寧各入一球而反勝。呢個成績相信球員、領隊同球迷都會滿意。𠵱家紅魔喺積分榜排第三，同第一嘅車路士（圖）相差八分，要爭冠軍雖然難啲，但都唔係完全冇機會。
車路士喺積分榜排第一已經一段時間，仲要少踢一場，同第二位嘅阿仙奴相差七分，可以話都幾安全。不過摩連奴係保守派，雖然同次名有距離，但一定唔會輕視每一場比賽。夏薩特就話冠軍好有希望，佢話：「目前我哋係榜首，爭冠嘅主導權亦喺我哋手上，大家都好想將冠軍帶返史丹福橋球場。」夏薩特咁講，即係話如果球隊想捧盃，最好都係贏晒所有比賽。車路士球員除咗努力操練、每場比賽全力進攻攞晒三分外，球員都好希望可以得到更多球迷嘅認同，所以餘下賽事，有理由相信車路士仍會全力以赴。
英超話晒進入最後直路，今個星期六車路士會鬥曼聯。兩隊目標都好清晰：就係要攞三分爭冠軍。車路士中後場有加利卡希爾、泰利同尼曼查馬迪，可以守到曼聯嘅費蘭尼。曼聯雖然之前連勝，但對手都唔係守力太好嘅球隊，今次雲高爾會以咩戰術突破車路士後防？將會係紅魔可唔可以爭到三分嘅關鍵。所以呢場波都係睇好主場嘅車仔少少，可以小勝2:1。
LULU