肥肥哋嘅數碼通（315）icon總裁黎大鈞果然份量十足，佢前日收市後一話做到今年8月就唔撈，數碼通嘅股價噚日就應聲下跌，收市跌近4%，數碼通市值即刻唔見咗5.7億元，數碼通上半年都係賺4.7億元咋。
市場口痕友就繼續八卦黎大鈞因乜事忽然唔撈，傳聞亦越來越多，有人估係大股東新地（016）嘅新一代話事人唔睇佢台戲，亦有傳聞話佢有急事要飛去加拿大一排，最簡單就估佢搵夠錢，退休嘆世界囉。
黎大鈞1992年幫手成立數碼通，中間離開過幾年，2001年回巢執掌至今14年，數碼通忽然冇咗個icon舵手，又未有接任安排，正所謂蛇無頭不行，如果9月真係有新iPhone推出，到時就真係考起管理層。