一個90後女員工，惡人先告狀的WhatsApp辭職通知，鬧得熱烘烘，記者朋友仔打來問我聽過有人連辭職都靠發短訊咁離譜未。見怪不怪，只不過是記者仔不識世界，才會有「不是連寫封辭職信最基本的禮貌都不會吧？」這一問。我好幾個月之前不是經已寫過「一切WhatsApp說了算」的嗎？職場規則規矩？是甚麼來的？肯發個短訊通知已是難得，突然失蹤，失蹤幾日之後突然出現若無其事繼續返工、又或者搵個朋友替代自己返工一樣得，連send WhatsApp都費事，自把自為自行決定了斷一條龍，咁容易被嚇倒，問你有幾多細胞夠死？
新世代職場白癡事件，可謂日日新鮮天天甘，寫出來恐怕大家以為我老作。為怕得罪眾多90後，反正寫作題材我大把，實在犯不着與未來棟樑為敵。講真實在難忍憋不住，就寫一個出來透透氣。
主管在外與客戶開會途中，想要另一份設計，馬上打電話回公司問下屬要，那位年輕下屬把文件印出來，用電話經WhatsApp拍下然後send出。明知主管用電腦做presentation，為甚麼不是用email傳過來？況且電話屏幕咁細，教大家如何能夠一齊睇？主管當場幾乎被氣死，再打電話問下屬究竟搞邊科，答案竟然是「乜你唔知WhatsApp有function可以send去你email咩？」OK！佢贏！我投降！
不過鬧還鬧，各位可有留意據透露原來這位霸氣90後女員工，即使無工作經驗，文憑試考零分。因為僱主公司人手極缺急需文員一名，見工時正正常常所以破例照請。老老實實，新丁一個文職一份，朝10晚6月薪一萬，另有加班補水及車費津貼，條件可謂不錯。那僱主亦說她上班準時做事交帶，否則不會過渡試用期，好來不識好去真可惜！到底是不識還是不惜？
張慧敏
http://www.facebook.com/HKcareerdoctor