今年2月跑畢東京馬拉松、完成世馬「六大滿貫」嘅長跑達人──恒生（011）公關阿頭張樹槐（Walter，水哥），剛過去嘅星期日，再度披甲，穿越凱旋門，完成業餘長跑生涯第50個馬拉松，同時為50名內地山區兒童，籌募教育資助，藉着自己人生新里程，多添一份關愛。
呢次巴黎賽事，水哥話係帶病上陣，起跑前讀聖經激勵士氣，穿越終點後則覺心境平和，夾雜如夢如幻感覺；直到返抵家中，老婆仔女送上祝捷蛋糕，才覺踏實驚喜。
自2002年開始起跑，過去13年，佢老哥完成咗50項全馬，即係平均每季跑一次賽事，堪稱鐵人。
嚟緊9月，佢又會聯同佢嘅長跑啟蒙摯友兼同事楊子江等，參加紅酒聖地博爾多嘅Medoc全馬賽事，太座亦同行打氣，一行十人仲計劃長跑後，訪當地酒莊，品酒談天。