去海鮮酒家食蒸魚，遇上條魚唔新鮮，大家首當其衝搵廚師嚟出氣，好少關到買手事；正如一隊球隊戰績差，大家通常都係埋怨教練領軍無方，又有幾多人鬧埋負責買賣球員嘅總監。曼城呢期亂局，領隊比歷連尼當然眾矢之的，大家又點會鬧到總監碧格列斯坦（圖）身上。
有時做打工仔都要講命水，前巴塞中場碧格列斯坦退休後原本都係講吓波，之後泊到好碼頭、前巴塞會長拉樸達，做咗巴塞總監，係就係期間有啲成功收購，好似由PSG收購朗拿甸奴，但之後越嚟越多無厘頭買賣，伊巴謙莫域一買一賣，巴塞唔見幾千萬歐元，巴塞迷仲記唔記得巴西前鋒基利臣，千幾萬歐元買返嚟，一場都未踢過，借吓借吓已經免費去咗哥列迪巴。拉樸達2009年下台後，被爆懷疑斂財同掏空巴塞資產，碧格列斯坦亦隨即唔撈，小弟就唔敢講係唔係身有屎，但佢就一定相當可疑。
不過做過六冠王巴塞嘅總監，要搵水魚真係話咁易，2012年碧格列斯坦做曼城總監，比起巴塞，有中東水喉支持嘅曼城，買人更加疏爽。曼城係少有行總監制嘅英超球隊，即係總監負責買賣，領隊負責排陣、訓練等。
曼城前領隊文仙尼已經批評過碧老，文帥話畀過十幾個名佢，佢一個都冇買返嚟，包括錯過收購馬拉加中場艾斯高，令後者幫咗皇馬拎冠軍。坦白講，小弟真係幾同情比歷連尼，曼城呢兩年新兵真係靠害，一個費蘭甸奴仲未夠平庸，仲要買多個費蘭度法蘭斯高，學足球小將玩孖仔射球咩，文加拉更加得啖笑，明知韋菲特邦尼要踢非國盃都要一月買佢，完全幫唔到手。計我話要問責，曼城第一時間炒咗碧格列斯坦先啦。
文：牽牛