巴黎聖日耳門（PSG）中堅大衛雷斯真係樣衰到爆，喺周三歐聯八強首回合，佢俾巴塞隆拿前鋒蘇亞雷斯通咗兩次坑渠，成為「通渠佬」阿蘇梅開二度嘅佈景板，搞到PSG主場以1:3輸咗畀巴塞，相信出線都凍過水。賽後，網民狂抽雷斯水，前英格蘭領隊荷杜仲話雷斯好似細路仔踢波咁差。
雷斯早排受傷，趕得切喺呢場做住後備。佢先見證尼馬喺18分鐘就攻破PSG大門。過多一陣，堤亞高施華受傷，雷斯臨危受命，入場頂施華個中堅位。換邊後，雷斯嘅噩夢來臨。67分鐘，巴塞嘅蘇亞雷斯右路推進，雷斯埋去搶波，點知想出腳就出事。蘇亞雷斯一通，個波就喺雷斯胯下經過，阿蘇即刻殺入禁區，其他PSG球員都冇計，結果阿蘇射成2:0。
有咩慘得過俾人通坑渠？就係俾人通兩次坑渠，仲要通嗰個又係阿蘇，雷斯真係樣衰到搵窿捐。79分鐘，阿蘇中路推進，再通多次雷斯坑渠，單刀射成3:0。堂堂身價5,000萬鎊（約5.7億港元）嘅球壇最貴中堅，雷斯喺舊年世盃巴西俾德國炒7:1場波已經俾人笑到面都黃，點知今場又瀨多鑊甘！
3:1不敵巴塞等出局
雖然巴塞臨尾有馬菲奧擺烏龍，幫PSG破蛋，但首回合主場輸1:3，PSG次回合喺魯營要淨勝三球先有價講，晉級機會渺茫。PSG教練白蘭斯幫雷斯解釋，「施華喺初段嘅受傷太突然，係一切問題嘅開始，我哋被迫派一個冇十足狀態嘅人上陣。」至於雷斯都話：「按計劃，我會喺下半場先入嚟，但施華嘅受傷改變一切。」
荷杜：八歲細路都不如
儘管PSG希望球迷包容吓傷癒冇耐嘅雷斯，但網民睬你都儍，炮製咗形形色色嘅改圖。英國班講波佬就一致抨擊雷斯，話冇態唔係藉口，其中荷杜嘅言論最激，「當你係防線最後一人，你要做嘅係拖延時間，等隊友幫手，一個冇教練嘅八歲小朋友先會好似佢咁。」前英格蘭國腳加歷查亦抽水話，「我同馬田基利喺兩周前嘅慈善賽守到阿蘇一戙都冇，但PSG呢對價值8,000萬鎊嘅中堅組合竟然守唔住。」至於呢場做咗「通渠佬」嘅阿蘇就話比賽只係踢咗一半，次回合都唔可以分心。
識睇，一定係睇足英台【英波Live】：
http://soccer.appledaily.com
http://bit.ly/engballlive