拜仁慕尼黑前晚喺歐聯八強首回合以1:3敗走波圖，三球都係輸自己。先係沙比阿朗素喺三分鐘於禁區頂犯錯搞到紐亞犯規輸12碼領黃，極刑由哥利斯馬射入；七分鐘後輪到丹迪發波瘟，哥利斯馬搶走佢腳下個波，單刀射入個人第二球；去到65分鐘謝路美保定頂漏，俾積臣馬天尼斯攞到個波，再扭過埋紐亞射入空門。好彩堤亞高艾簡達拿喺28分鐘幫拜仁攞到個作客入球，佢哋先至未被判死刑。
拜仁教練哥迪奧拿話：「球員都係人，犯錯偶爾會有，但喺呢個水平嘅賽事出錯就會被狠狠教訓。」至於隊長拿姆就表示：「輸1:2仲有機會，但輸到1:3就有啲難度。點都好，我哋仲有可能喺主場贏番2:0。」成日被稱為「宇宙仁」嘅拜仁可能太輕敵，歷來四次喺首回合作客輸超過一球，最終都係出局，睇吓哥帥可唔可以破數據啦！眾所周知拜仁對歐聯志在必得，上屆佢哋喺歐聯四強大敗畀皇馬後，據聞哥帥俾班高層插到暈；若然俾波圖踢出局，哥帥隨時要提早離隊到時最開心嘅，肯定係曼城。
識睇，一定係睇足英台【英波Live】：
http://soccer.appledaily.com
http://bit.ly/engballlive