曼城呢排啲成績好似倒水咁，我同牽牛都覺得要寫番期《咖喱牛腩》鞭一鞭佢。牽牛兄認為曼城衰在有班前巴塞高層，咁小弟就由場上表現出發，講吓耶耶托尼（圖）嘅問題。
有留意開曼城嘅朋友都可能好籠統咁歸納一句，就係耶耶散步。準確啲講，佢雖然踢防中位，但有顆進攻中場嘅心，尤其係呢季，成日攻咗上去，但因為老同態度問題，防守就散步，搞到曼城對防線嘅保護唔夠。
曼城今季用開4-2-3-1或者4-4-2陣式，雖然間中耶耶都會踢攻中，但大部份嘅時候，佢都拍住費蘭甸奴打個雙防中。喺曼城最近輸嗰幾場，即係對曼聯、巴塞隆拿、水晶宮、般尼同利物浦，耶耶都係踢防中，但睇數據，佢今季係好積極、甚至係太積極咁參與進攻。上季耶耶有成20個聯賽入波，場均射門都係1.8次，但今季耶耶嘅場均射門急升至3.2次，係佢加盟以嚟呢項數據最高嘅一季。防守上，耶耶今季場均搶截跌1.1次，係佢加盟以嚟最低嘅一季。
喺耶耶嘅問題上，佢自己同領隊比歷連尼都有責任，佢今年31歲，體能有啲下滑係正常，而且佢夏天踢完世盃就到冬天踢非國盃，真係勞心勞力。耶耶已經唔可以好似以前咁攻守兼備，領隊應該要喺呢個時候幫球員作出取捨，例如擺得耶耶喺防中，就要限制佢安守本份，唔好成日走上去攻，搞到返唔切嚟。如果想要耶耶參與進攻，就要喺佢身後放多個人，等佢專心踢進攻中場。
文：咖喱