2017年特首選舉方案可唔可以食糊?至今尚係未知數,但幾場撬票會,令政圈風雲色變。點知與此同時,有傳媒報道下屆立法會議席分佈有改動,港島會7席減1席至6席,九龍西就會加1席去到6席。點解政府突然有此改動?有花生友話打死唔信係益泛民,但亦有口痕友話,建議為民協度身訂做。
向民協賣大包
為乜政府咁大隻蛤乸隨街跳,向民協賣大包?呢位口痕友話喎,𠵱家政府想喺政改方案撬民主派票吖嘛,而上屆民協譚國僑得票排第6,令民協緣盡九龍西,今次若然加番一個位,仲唔係向民協馮檢基送上橄欖枝,藉此誘使阿基政改袋住先?
花生友對呢番用加議席撬票嘅意見,都唔敢落重注,事關增減議席對各大政黨牽一髮動全身,唔會為張票去郁啩?花生友覺得,加1席後更多泛民參選搶票,如果建制派配票得宜,可能將新增1席袋住先。
港島區減1席後,唔少人覺得上屆最後一個入局嘅工聯會王國興最有危機。都係嗰句啦,泛民喺雨傘運動後新興政團眾多,而得票未必有增長,若個個落晒場,或者係明益對家。至於離島或由新西撥入港島區,有人話攞到唔少離島飛嘅民建聯陳恒鑌肯定覺得唔方便,花生友問過佢,佢話冇問題,唔知風從哪裏來。
花生友