康宏金融（1019）主席王利民出名鍾意跑馬拉松，過去5年跑過晒撒哈拉沙漠、北極同南極，呢啲咁高難度又超辛苦嘅地方，華華以為佢跑過一次都夠皮，點知佢呢個月上旬又去撒哈拉沙漠，跑咗7日，原因？咪就係為陪王太跑一次囉，佢仲喺終點錫咗太太一啖慶祝，呢啲係咪叫做主席的浪漫呢？
王太近年俾老公感染，開始跑埋一份，王利民早於2011年跑過撒哈拉沙漠，王太話想跑沙漠挑戰自己，王利民當然奉陪到底。今年咁啱係撒哈拉馬拉松舉辦30周年，跑手接近1,400位，較2011年800位大幅增加。賽事全程250公里，本月3日開始，跑足7日，王利民最終排名第1,130，王太就排第1,129，明顯係老公讓老婆一個身位。
聞說，佢哋各人要一路揹住十公斤行李，包括食物、水、睡袋等等去跑，而且基於環境關係，佢哋7日都冇換衫冇涼沖。為保護雙腳免被沙磨損，佢哋就着住專為沙漠馬拉松而設嘅鞋套，確係難忘經歷。