噚日網上瘋傳一張poster,係民建聯社區幹事葉子弘喺fb上載嘅傳單,內容係佢同西貢區議員陳國旗25號會同將軍澳街坊到PopCorn STAR Cinema睇《復仇者聯盟2:奧創紀元》;市民如果要攞飛,要填表答問題,題目係「以上圖片中的人是誰?」附圖則係黃色衫嘅四眼仔,答案選項包括葉子弘、郭富城、梁朝偉(圖)及劉德華。
網民留言話,「佢唔係覺得自己似呀?」相信答案在心中。八方問過葉子弘,佢話搞呢個問答比賽希望人人有獎,「一定唔會有人搞錯」。咁佢自覺同呢3位靚仔似樣嗎?「冇可能,雖然我哋真係有一個共通點,就係大家都係男人」,笑言唔介意網民攞嚟笑。