左丁山平時有幾個定期飯局，飯友採取輪流做東制，每人一年負責請兩次左右。上星期四嘅午飯、晚飯，碰啱都係左丁山做東，於是吃個不亦樂乎。請客不難，每次負責訂地方及寫菜先至頭痛，中午嗰餐，諗咗一輪，心思思想食燒乳豬，於是訂咗喜萬年。好耐冇去咯，經理祥哥寫菜，吃燒乳豬行頭，水準真係四十三年不變，皮薄肉靚，吃得人人叫好，一時之間諗唔到在港島吃燒乳豬，有邊一間好得過喜萬年。再來大蝦粉絲煲、天婦羅龍躉球、古法鹽焗雞、排骨粥加油炸鬼，最頂癮係水浸菜心，最初以為係上湯浸，點知係響應政府低鹽低糖之妙品，就是「礦泉水浸菜心」，夠晒衞生喇啩，陳會長一路食一路讚，我地話要請佢位公子，即降低食物中的鹽和糖諮詢委員會，主席陳智思嚟喜萬年試吓呢味菜，了解酒樓實際上如何迎合市場需求，自動在蔬菜食譜方面有所創新，減鹽減糖利食家。
我地班人吃午飯，來來去去係在上海總會、浙江軒、賽馬車會、中華總商會、喜萬年、佳寧娜之類，不同會所酒樓各擅勝場，但其間有人透露，佳寧娜大廚偉哥退休，以後要吃潮州菜的話，或要另諗辦法。又有人講及5月19日泰國軍人控制之政府會審訊前總理英祿，紅衫軍公開聲明，若然判英祿有罪入獄，會發動十萬人到監獄陪坐監，請大家留意吓泰國時局喎，如要到曼谷旅遊，到時要睇清楚先至起行。
到了晚上，活力先生自告奮勇，老早訂咗灣仔大榮華一間房，話可以讓俾左丁山等人使用，於是無謂傷腦筋啦，拉隊去大榮華食圍村菜，荷芹炒腰膶，天麻玉竹米酒燉硬邊……之類，款式甚多，論味道則不如喜萬年，不過價錢平咗幾乎一半，無怪各有捧場客。席間全是專業人士，有人講起市建局行政總監辭職一事，咸認為小題大做，消息人士指市建局搵顧問公司俾意見，實乃源於財政司司長嘅主意，因為司長幾關注市建局之虧蝕，否則嘅話，你估蘇慶和主席會特別搵嘢做咩。份顧問報告，還未交到俾董事局商討，已有人爆料，令啲董事莫名其妙。消息人士話：市建局啲董事好有牙力，蘇慶和身為主席難以一個人說了算，譚小瑩辭職竟將矛頭指向老蘇，行錯方向矣。