鬥志往往是逼出來的！成績有排未達標之練馬師胡森，一連兩個賽日贏馬減壓，繼剛周日爆完33倍「歡欣滿載」，呢晚渡江谷戰照贏可也，第二場五班2200米最長途，佢隻「精彩時機」複製「歡欣滿載」黃皓楠贏馬軌跡，沿途在蘇狄雄胯下墮後，淨跑一條直路掃晒，五歲馬苦戰三季跑到第21場終於開齋，爆16倍冷win，騎練今季合作兩捷皆贏谷草。胡森頭馬差一場就見到雙位數，現以9win仍欠6場才達標。
今場跑第二係大熱門「永常勝」，有14win之李易達爭上岸功虧一簣，呢條未畢業馬房Q，有40倍好和味。三、四名分別係連達文「常盈多」同薛寶力「手機皇」。至於過去一個月，常入場為「帶」系馬打氣的馬主王家揚，剛周日旗下團體馬「帶盈來」連捷後，這晚他又與他的另一半索女，為今場愛駒「帶利來」打氣，可惜換了新髮型激似劉心悠的靚靚「帶女」，這晚未能「帶」來好運，「帶利來」守好位下直路散晒只跑第10。
至於胡森，因身在英國買馬，近兩次賽事均缺陣，結果都有馬贏，「精彩時機」馬主城市之光團體成員陳生表示，等了這場頭馬好耐，他笑言胡森兩次賽日不在港反而搏殺得手，認真巧合。