2008年金融海嘯之後，美國兩位前財長保爾森（Henry Paulson）與蓋特納（Timothy Geithner）先後出書解構金融海嘯嘅內情，香港都有代表，財經事務及庫務局前副局長梁鳳儀推出新書《失序的資本：QE後遺症．重建亞洲金融新秩序》，探討金融海嘯禍根，又預視喺未來世界金融體系入面，亞洲新興國家將會獲得更大發言權，重建金融新秩序。
梁鳳儀寫呢本書都好啱，佢1994至2008年一直喺金管局工作，2008年8月擔任財庫局副局長冇耐就爆發金融海嘯，佢有份處理危機。佢舊年初忽然話唔撈，走咗去英美3間政策研究與學術機構做顧問工作，順便炮製《失序的資本》。𠵱家佢喺證監會做投資產品部執行董事，應該可以將研究所得落實喺新工作上面嘞。