第五場三班千二米，輕磅大冧巴馬一Q返，11號「人和家富」同12號「叻陶寶」後上一齊冚過大熱門「綠草如欣」，包辦31倍啡燈Q，涉及注碼約50萬，落飛黨扣本後贏了約1,500萬。
「人和家富」爆13倍冷win開齋，文家良馬房近兩win由田泰安一手包辦，後者贏馬為出征澳港盃造勢，佢多年前曾代表毛里裘斯，出戰澳門國際見習騎師賽，本周六將策「好健康」出戰澳門氹仔馬場。
今場比較唔好彩係楊明綸座騎「叻陶寶」，連續兩場落飛出擊都係跑位置，來港至今仲未開齋。大熱門「綠草如欣」上次在港一出谷草1000米即勝，今場加程唔能夠連捷，只得第三；第四名係位置最熱之「威威寶貝」，四重彩派二萬一千幾。
「人和家富」四位馬主中，包括愛國歌手張明敏，此駒今仗捧走香港交易所盃。練馬師文家良表示最初以為「人和家富」跑一千米好些，今仗增程爭谷草千二米才發揮威力。由於此馬細細粒，沙田直路較長未必可貫注到底，快活谷較合發揮，希望未來再在谷草短途為馬主取得好成績。