噚日政圈傳民協馮檢基「轉軚」，引嚟好多猜測，原來虛驚一場。是咁的，阿基前日疑似喺立法會停車場唔小心，揸車撞到民建聯李慧琼嘅座駕，所以講緊嘅其實係揸車「轉軚」。雖然翻睇過閉路電視，都證實唔到真係阿基撞，但佢都照畀咗4,000蚊李慧琼，仲寫咗張紙話「賠住先」。
政改都贊成袋住先，李慧琼梗係袋住4,000蚊先喇，佢坦言座駕花咗，都好心痛，但就覺得既然阿基賠咗錢，無謂糾纏，息事寧人。
睇唔出李慧琼都係錫車之人，但佢同時自爆，都係7年前先走去做學神，考自動波私家車牌，而且考到第二次先成功，之後都好少揸，所以到𠵱家仲係生手一名，笑指佢老公見狀，亦唔敢畀佢成日揸，所以除咗司機，佢多數都係坐老公車或坐公共交通工具，反正仲方便，據知李慧琼被撞嘅係Toyota Noah七人車。