新加坡建國總理李光耀逝世三星期，佢嘅新抱，即新加坡主權基金淡馬錫行政總裁何晶就攞三個月大假。外界估計佢想淡出，淡馬錫冇解釋原因，淨係話唔係退休，何晶放完假都會返工。
何晶2002年加入淡馬錫，今年61歲，多年來，市場成日傳佢會退落嚟。其中喺2009年，淡馬錫曾經宣佈由必和必拓前行政總裁顧之博接手做CEO，但顧之博未上任，就話同公司有分歧，最後都冇做。
事實上，何晶做CEO後，淡馬錫就開始增加海外金融資產投資，點知2007年開始，歐美銀行業唔掂，拖累淡馬錫截至2009年3月底止財政年度，純利急挫66%，係歷年最大跌幅。有指就係因為何晶投資失利，所以被拉下馬，不過最後何晶仍然穩坐舵手之位。
亦有分析讚何晶，認為淡馬錫喺佢領導下，管理資產大增至1,770億美元，躋身全球第11大國家財富基金。