新民黨前日選出新一屆中央委會委員，成立4年嘅新民黨黨員人數近700，佔領運動後仲新增59位黨員，一半係主動加入；芸芸新黨員中，焦點梗係落喺葉劉舊同學兼師姐、前高官鍾麗幗身上。
做過市政總署署長嘅鍾麗幗，「成名作」係因為中央圖書館嘅設計同時任市政局主席梁定邦公開罵戰；佢退休後加入恒基集團仲幫手宣傳恒地角逐西九，被人非議曾任房屋署副署長，會有利益衝突，名副其實係惹火人物。今次重出江湖加入新民黨，莫非係想幫吓葉劉，助好姊妹入閘選特首？
早前同新民黨鬧不快嘅前副主席鄭承隆，今次改選後正式被「除名」，有傳佢年底有意喺荃灣區議會嘅深井選區出戰。據知該區除咗佢，仲有新民黨同工黨，3人爭嗰一個位。