可能作風溫和，令人覺得佢會轉軚啦，所以政改三人組近日開始約見各大政黨商政改，竟然冇公民黨湯家驊份。噚日湯狀喺立法會一見到記者就主動反問：「係咪想問我有冇同政府見面？答案好簡單：『冇。』」繼而笑言可能連政府都覺得袋咗佢嗰票，「如果係咁，真係對我最大嘅侮辱」。
其實公民黨喺立法會有6票，理應同民主黨平起平坐，噚日有份出席林鄭撬票會嘅民主黨何俊仁都睇唔過眼，仁哥話噚日一見到林鄭，已經批評政府連公民黨都唔見，咁樣做嘢係冇晒規矩，似乎搞「小動作」分化泛民。而其後政府真係有打畀公民黨梁家傑約見喎，唔通係仁哥嘅成功爭取？