春夏不時都會好潮濕，搞到費清個人好攰。啲同事叫費清煲涼茶（圖）祛濕，但其實原來煲涼茶，都有好多Dos and Don'ts㗎。
#藥材唔好洗
浸大中醫藥學院高級講師徐大基話，廣東天氣炎熱，地勢卑濕，廣東人又鍾意食海鮮，煮餸會煎、炒、燒，而且會加薑、蒜、葱、椒鹽、八角等辛溫燥熱食物，所以廣東人易燥熱、濕滯，而涼茶就對症下藥。
有人鍾意去涼茶舖飲涼茶，但中大中醫學院講師梁晶就話，涼茶最好自己煲，因為自己買材料，成份比較可靠，而涼茶舖嘅涼茶唔會列明成份。廿四味、五花茶都用廣東地道草藥，有清熱祛濕功效。
今期《選擇》月刊除咗訪問兩位講師，仲提醒一啲涼茶Dos and Don'ts，例如煲涼茶嘅藥材唔好洗，因為種子等部份藥材會洗走咗；煲涼茶最好用瓦煲、瓷煲、砂煲、搪瓷煲，因為如果用鋁煲等，而藥材有礦石，過程中器皿有機會釋出金屬，影響藥效。一般涼茶都可以再煎煮一次，唔好倒咗咁嘥。涼茶經過冷藏唔會影響效果，但係涼茶凍飲可令脾胃不適，最好加熱先飲，怕熱就最多都係室溫飲。
＃要生計，也要生活 ＃毋忘初衷
費清