女神陳凱琳（Grace）最近得到唔少單身男士寵愛，先有陳山聰和黃又南，最新緋聞男友係上門借碟爆出戀聞嘅鄭嘉穎，佢噚日出發去荷蘭為新劇拍外景，幾個緋聞男友竟然都有同行，一朝早Grace、山聰和又南到達會合大隊，嘉穎喺人齊之後出現，現場記者邀請四緋聞男女大合照，嘉穎表現抗拒，喺再三要求下佢先肯合照，佢同Grace全程仲係零交流，搞到Grace不知幾尷尬。
Grace：最重要係夾
Grace俾人話佢電暈嘉穎：「唔知點講，拍劇啫，大家係朋友。」仲俾人話係「父女戀」，Grace話：「兩個人嘅關係最重要係喺一齊舒服同夾，年齡唔會睇得咁唔開。」又南同山聰被指追女不遂，又南否認做「柴可夫」，亦冇車過對方；山聰仲斬釘截鐵咁話：「我哋只係同事，make sure冇可能。」
嘉穎搞到場面咁尷尬，但係佢就覺得唔尷尬，講到父女戀，佢話冇所謂。謝安琪知道「穎琳戀」炒得好熱：「如果真嘅，會替佢開心，佢孤單寡佬，有戀愛會開心啲。」另外，嘉穎舊愛王馨平話知道呢單緋聞，但係佢選擇封嘴。
撰文：馮仁昭
