台灣藝人小S(徐熙娣)同老公許雅鈞曾被傳發生家庭暴力，早於2010年更有台灣媒體指小S因與朋友貪玩，深夜回家後夫妻發生爭吵，疑遭家暴，事後小S發聲明澄清係「家抱」，唔係「家暴」，但類似傳聞久不久就被炒一次。
昨日有讀者報料指，喺今個月13號於台灣播出嘅綜藝節目《康熙來了》中，嘉賓張婷婷講為咗發片佢哋有幾辛苦，當時小S輕撥頭髪時，竟然發現小S左眼角側有瘀傷。翻查小S嘅微博更見佢不時用頭髮遮掩該位置，外出亦長期戴上黑超。
其實，自去年老公許雅鈞涉「胖達人」內幕炒股案後，兩公婆已甚少一齊公開露面，但小S一直keep住喺微博貼出佢同老公嘅合照晒恩愛，故此今次係唔小心整親，係同小朋友玩嗰陣不慎「中招」，定其實係角度問題，就要等小S親自解畫了。