港交所（388）與港交所行政總裁（CEO）李小加呢期真係紅到不得了，北水南下刺激港股交投日日接近2,000億元，滬港通之後，深港通又講到年內成事，不過呢啲都唔講住，佢哋下個月又舉行倫敦金屬交易所（LME）亞洲年會。
港交所買起LME後，今年係第3年舉行LME亞洲年會，今年係喺5月20日喺灣仔會展舉行全日嘅研討會，搵來金屬交易業內人士演講，財爺曾俊華將會擔任主禮嘉賓，當晚仲會有一個black tie dinner。研討會係要買飛入場，晚宴就由LME會員買枱再請自己嘅客人參與。
聞說，舊年研討會全場600個座位爆滿，今年照舊賣1,700元一張飛，港交所冇見反應好而加價。咁當然喇，港交所唔會賣晒所有飛，會留起部份送畀合作夥伴。