港股有丁蟹效應，A股亦有股神效應，一有騎呢股神面世，個市就唔慌好。噚日出咗單跑車股神新聞，震驚全國，噚日大市即跌。事緣4月11日夜晚，喺北京鳥巢附近法拉利同林寶堅尼相撞，觸發內地敏感神經，因為分分鐘爆出官二代醜聞，好似令計劃公子炒車案咁，引發政壇大地震。
點知林寶堅尼車主爸爸話，架車係阿仔炒股賺番嚟，令內地輿論譁然，法拉利居然一下子撞出個20歲少年股神。之前在1月，內地網上亦流傳有少年股神，15日賺一億，結果當時大市即跌。
早前郭美美網上炫富，show架瑪莎拉蒂出來，引發內地對紅十字會信心危機。郭美美媽媽話，架車亦係炒股賺番來，成為另類股神。當時A股一直熊市，有人話，直到郭美美被公安拉咗，呢輪牛市先開始。
黃尹華