唔係咁邪呀？港股怕《大時代》？重播消息一出，呢兩日就出現陰燭。不過，北水滔滔南下、國際大鱷泊港，熱錢圍城，已連續六日，每日2,000億元成交。恒指前日回吐454點後，昨日反覆微升57點，收報27618。牛市之時，往往會出現大漲小回式整固，就算出現震倉，亦毋須過慮。
現時中外資金簇擁，加上港股基本因素良好，PE僅13倍，估值仍低，除非有重大負面消息，否則在27000至28000水平整固後，本月內上破30000關的機會仍大。恒指只要守穩26247至26732之間的上升裂口，後市仍樂觀；就算跌穿上升裂口，仍無改向上趨勢。中長線來講，恒指大成交突破2011及2008年低位營造的中型及大型三角形阻力，調整再上更健康。
港股踏入4月就進入瘋牛市，瘋狂程度直逼2007年10月。呢兩個禮拜，無論內地大媽抑或本地師奶，都以激情取代理性，在港股市場瘋狂鳩嗚，買股票好似買奶粉，隨手掃貨，一下子炒貴幾十巴仙。當我仲猶豫值唔值得高追時，又掃高十幾巴仙。戰友話齋，人生最大痛苦，莫過於在一班瘋癲的人中保持理智和冷靜。
港股咁牛，確係令我心又喜、心又慌。早幾日我唔敢高追，又唔敢造淡；現時打算趁大市唞氣，把握機會補貨。內地昨公佈首季GDP降至7%，市場對短期內再降準的憧憬升溫，中資金融股睇高一線。
掛牌前夕發盈喜
A股交投比港股更活躍，內地券商股受追捧。我的心水係上周五在港上市的廣發証券（1776），昨收報24.8元，H股較A股折讓30%，單炒價差都有大把水位。北水上周才分流到H股，斷估唔會只炒幾日，起碼炒到AH價差收窄為止。廣發掛牌前夕又發盈喜，預計首季約多賺兩倍。A股周一起全面開放一人一戶限制，或觸發佣金戰，若見券商股回調，可逢低吸納。
廣發主要於內地從事投資銀行、財富管理、交易，以及機構客戶服務與投資管理等業務。換言之，係集證券及資產管理業務於一身，有別於其他上市內地券商。廣發的期貨經紀業務遍佈內地16個省及直轄市，亦有別於部份只專注單一地區的內地券商。前年完成收購Natixis旗下商品交易部門後，更成為唯一在倫敦金屬交易所擁有會員資格的中國公司。
港股升浪未完，持有廣發者毋須急於獲利離場，後市有空間再升一、兩成；未有貨者，不妨現價買些少，因為市場唔等人，現階段大市唔多理基本因素，最重要係做好風險管理，定止蝕位並嚴守。
割柑人
本欄逢周四刊登