【第34屆香港電影金像獎之男主角篇】今屆香港電影金像獎頒獎禮將於大後日（19日）舉行，如果要說今屆的最佳女主角備受矚目，那麼最佳男主角獎是由燦爛歸於平淡的一項。不難以減除法估計，爭奪戰將會落在劉青雲跟黃渤之間。青雲憑《竊聽風雲3》中富計謀而內斂的土豪，跟《暴瘋語》中陷入崩潰的角色為他贏得兩個提名，對於再度陷入自己打自己，分薄票源迷思的青雲，以「係你就係你嘅」坦然的心情面對。而黃渤憑《親愛的》獲提名，卻看好對手青雲，反而希望同劇拍檔趙薇可以封后。
撰文：張俊銘、何永寧
青雲：唔怕分薄票源
劉青雲曾經開玩笑形容香港電影金像獎一直跟自己「對着幹」，一心以為自己會贏時就鎩羽而歸，反而在毫無期望下那次就居然封帝，所以一直都以不要想太多的心態去面對。
懷疑自己演出
日前青雲接受本報專訪時，對於今年他再以兩部電影入圍金像獎最佳男主角提名，更先拔頭籌憑《竊聽風雲3》獲頒香港電影評論學會最佳男演員獎，似乎為金像獎打了支強心針：「我冇諗咁多，如果要得獎，點都可以得到。」連得獎都不關心更遑論想那一部戲獲獎：「其實坦白講，我真係唔知，因為我拍完就算數，《暴瘋語》我未睇晒成套戲。我唔覺得自己演得好好，因為自己睇自己同觀眾睇係唔同，我自己睇番，懷疑係唔係應該咁去演繹。」至於兩齣戲較為喜歡哪一齣，青雲說：「兩套好唔同嘅戲，《竊聽3》好多唔同性格嘅演員，呢個角色孤獨好多，其實係sad ending，你問我鍾意邊個我諗唔到，不過我覺得冇乜所謂。」
謙稱靠劇本好
面對會否擔心兩個提名被分薄票源，青雲苦笑：「係你就係你嘅，好多年都係咁樣，我覺得冇話分唔分薄，係有咁嘅可能性。我其實覺得幾開心，拍呢幾部戲都有提名，當然攞獎係開心嘅事，《竊聽》拍咗三部都好收得，算係對大家一個交代，好多時因為劇本寫得好，剪接得好，好多時我自己睇到個樣好似唔連戲。」
經常談論《竊聽3》其實青雲還有憑《暴瘋語》入圍最佳男主角，相信不少中年觀眾都看過一部舊片《癲佬正傳》，《癲》片的導演正是今日的《暴》片監製爾冬陞。今次在《暴》片飾演精神病患者的青雲亦有欣賞過《癲》片，青雲指都是社會性題材電影，他說：「𠵱家呢個世界，精神病同以前睇法好唔同，𠵱家叫思覺失調。」青雲的角色是精神病康復者，他在演出前了解過相關個案，他說：「我演嘅角色係好番嘅，但其實有殺過人，出嚟面對社會唔容易。我親身接觸病患者就冇，但曾經見過一個的士司機，佢全程不斷唱自己改歌詞嘅歌，感覺特別。」
最佳男主角提名名單
彭于晏《黃飛鴻之英雄有夢》
劉青雲《暴瘋語》
黃渤《親愛的》
劉青雲《竊聽風雲3》
吳彥祖《魔警》
資料來源：香港電影金像獎協會