噚日風和日麗，啱晒郊遊，遠離繁囂，洗滌心靈。首富李嘉誠豪擲15億港元起嘅大埔慈山寺，噚日起開放畀公眾參觀，但要預約咗先有得入，未來一個月，每日400個名額都爆晒！八方噚日到場所見，唔少預約唔到嘅善信，唔怕摸門釘照上山，話望吓門口同觀音像都好，順道打咭自拍。如果門外有個誠哥紙牌做自拍位，就very nice
貼心借草帽畀記者
家住深圳嘅林生同太太，特登帶埋朋友揸車上山，知道冇得入場，林太就話，「我哋山長水遠嚟到都入唔到，噚日個預約電話又冇人聽，好失望呀」，惟有喺門口影張相留念啦。佢話雖然真係好想入去，但唔強求嘅，「隨緣啦」。同樣冇預約嘅趙女士就好彩啲，遇上其他善信有空餘名額，帶佢入場，「都係因緣」。
退休人士袁生同太太唔係佛教徒，「做佛教徒好論盡，譬如有蚊打唔打好呢？」，但都由愉景灣屋企遠道而嚟，坐勻港鐵迪士尼綫、荃灣綫、觀塘綫、東鐵綫再坐小巴再行20分鐘斜路，都唔嫌攰。袁生話，如果早知寺內冇膳食，會自備定食物，因寺內太舒服，留到晏晝5點鐘閉館都唔會夠！佢話寺入面勝在人少少，「大嶼山寶蓮寺都人山人海啦」。
寺方各方面都好體面，譬如招呼八方嘅行政人員，又靚女又貼心，準備定越南草帽借畀一眾行家，又主動提供飲用水咁；記者想去方便，亦獲入園內放低煩憂，認真窩心。
李八方
mailto:[email protected]
