今季NBA常規賽認真激烈，未打到煞科日都仲未決定東西岸共16個季後賽席位。西岸方面，塘鵝同雷霆鬥得燦爛，周一齊齊贏波；其中雷霆後衞韋斯卜克（Russell Westbrook）打甩技犯，可以主場鬥拓荒者，結果佢貢獻36分同11個籃板，以101:90擊敗對手。塘鵝亦都不甘示弱，作客木狼有「一眉」安東尼戴維斯（Anthony Davis）拎雙雙24分11籃板，以100:88擊敗對手。塘鵝同雷霆同得44勝37負，塘鵝以較佳對賽排第八，周三煞科日決定兩隊命運，雷霆作客西岸包尾嘅木狼，理應勝券在握，而塘鵝面對大勇嘅馬刺就好難講，事實上馬刺雖然已經上岸，但要保住西岸次席，都唔可以輸波。
網隊慘敗等奇蹟
東岸方面亦都激，網隊周一大敗畀公牛，跌落第九，煞科戰必須擊敗魔術之餘，亦都期望溜馬最後兩場最多只可以贏一場，先有奇蹟可以出線。