泛民主派「飯盒會」議員為咗表明心迹，先後至少3次聯署反對人大8.31決定，最近嗰次就喺星期一，但聯署上有名嘅公民黨湯家驊噚日卻喺電台節目話，對聯署已經感到厭倦，而佢實則冇簽到周一嘅聯署，表現得無可奈何，到底中間發生乜嘢事？
八方問過泛民飯盒會召集人、即係湯狀黨友公民黨黨魁梁家傑，佢話聯署發表前，經已畀晒各位泛民議員睇，最後都冇人覆。原來飯盒會過往搞聯署，一般都係草擬內容後，透過WhatsApp畀議員過目，有問題就出聲，唔出聲即係OK，可以落名咁話。
據知周一個聯署第一稿上周六已發畀泛民，冇人有意見，到周日出第二稿都冇人覆，周一臨出街前都係冇人話有意見；湯狀「被簽名」，事出必有因。