惠英紅去年憑電影《殭屍》奪走「最佳女配角」獎座，今年再憑電影《那夜凌晨，我坐上了旺角開往大埔的紅VAN》得到提名，她信心爆棚說：「今年個個都唔睇好我，我一定零機會咩？要我揀一定揀自己。」
電影改編自網絡小說，惠英紅扮演的神婆，是電影版後加人物，她說：「我諗到原著冇呢個人，好怕高登巴打絲打會杯葛我，壓力好大。」壓力最終變成動力，惠英紅幾番思考：「我決定將搖風擺柳性格融入神婆中，佢份人好自卑，不停咁用自大去冚實啲自卑，現實生活好多呢啲人。」
想與林雪齊奪獎
惠英紅笑言與對手林雪和任達華等過招，令她不敢鬆懈：「記得有場戲，我留意到林雪除手套，佢連隻手都做埋戲，我忍唔住笑佢唔好咁搶喎，連陳果都笑我哋班老嘢殺到班後生一戙都冇。」惠英紅最希望拍檔林雪跑出最佳男配角：「佢好勤力，每場戲都不斷用腦做功課。」
場地：逸．酒店
服裝：Marina Rinaldi