「你做基金agent同我講唔識玩呢個市，你賣屎片呀？」作為一個專業理財策劃師，竟俾女朋友提出如斯質疑，呢個絕對係侮辱！但你估我想咩，須知我係專業的，揀股票會睇基本因素，睇PE，阿怡呢頭問3378，嗰頭問3888，一大堆股票莫名其妙升爆廠。你問我應該買唔買，就等如問一個西醫，飲完符水係咪就會病好一樣。
鄭少秋一出 個市一定縮
不過，作為男人，贏唔到錢事少，失威事大，於是，我痛定思痛，嘗試了解股市另類分析。傳說香港有三種神秘力量，佢哋都能夠以超自然嘅方法去左右股市，只要掌握任何一種再縱橫股壇，雖未至於無往不利，但都可如先知般洞悉先機！
第一種，叫K.S.Field。你有可能唔識，皆因佢嘅中文名為「李氏力場」也。第二種叫蘋果A1魔咒，只要蘋果頭條講股市幾亢奮，當日個市就算唔跌都一定會震！真係一聽就令800萬港人震驚了。你唔信？check番噚日同埋上星期五嘅頭條。
作為一個普通老散，呢兩種力量我鑽研來都多餘！我知道第三種更具研究價值，就係「丁蟹效應」，鄭少秋一出，個市一定縮，呢個係宿命，正如《大時代》重播消息一出，個市噚日就隊落嚟！
「國美（493）今朝先高追，而家點算好？」噚日證券行一個師奶見隻股由高位隊咗一成落嚟，騰到眼水都就標，點知佢身旁嘅阿叔，就有如智者上身，「一於溝貨！跌係跌咗啲，不過中國人識國美㗎！」係咪癡線！隻股之前已升咁多，急跌仲要人向下溝貨，有冇常識？睇住呢班無知散戶，我笑而不語。然後，望多兩望，阿叔堅定嘅表情，理直氣壯嘅聲線，令我諗起一個人。「你揸住好多呀？跌咗好多！」那邊廂有個阿太，見佢睇住IGG（8002）報價，一睇佢堅定眼神，就知佢未沽，「小朋友，炒股嘅重點唔係睇跌幾多，而係等浪子回頭金不換。」
聽到呢句，我火起了！「師奶，你醒吓啦！未聽過跌一成要止蝕？咁樣殺落嚟都仲話等佢浪子回頭！輸死你呀。阿叔仲離譜，咪兩頭望，係講你呀！你叫你個朋友溝貨，竟然係因為大媽識呢個牌子，佢哋夠識霸王（1338）啦，你係咪買先？唔該你班羊生羊太，炒股前做功課啦！」
望住呢班友，我崩潰了，我想發出震撼性聲音叫醒佢哋，望住阿叔、師奶震驚嘅眼神，我以為我成功了。點知佢哋竟然話……「你想要我手上啲平貨都唔使咁樣鬧我哋嘛，你而家落場買就得啦！」「我未沽貨，但係冇做錯。」「人善人欺天不欺，人沽我買天不怕！」聽到呢度，我記起了，「一於打感動牌。舊就舊咗啲，不過中國人好受㗎！」「呢件案重點唔係我有冇殺人，而係浪子回頭金不換。」一句又一句，全部都係丁蟹嘅對白！
我企喺證券行一日，我就知與其話港股A股化，不如話港股丁蟹化。至於港股結局係點，我唔知，但我只知道，丁蟹最終逼到所有人，死嘅死，癲嘅癲。
千頌C
http://fb.com/winbigwok
本欄隔周三刊登