朋友M叫左丁山寫吓最近股市情況，左丁山話股市受北水南下嘅影響，瞬息萬變，寫隔日稿（即今日五點截稿，明日刊出）猶自可，寫副刊專欄喎，稿件刊登出嚟已經可能係明日黃花，當佢馬後炮都嫌過時，呢啲嘢留番俾財經版去追蹤嘞。也曾有朋友叫左丁山寫吓體育、賽馬，自己當然識寫，但無謂與時間競賽，對自己及編輯構成壓力吖。
呢日在陸羽飯局，經紀M一坐低就做低頭一族，望住手機睇股價，我地笑佢一定係搵咗唔少，經紀M笑曰：「欣逢大時代，北水南下，阿爺派錢，唔賺番啲都對自己唔住。」問佢買乜嘢股好，經紀M話：「歌仔有得唱，只要信，不要問，H股乜都買番一啲，冇蝕底，你地最好沽晒啲港股，改買H股。」哈，H股都有好多隻，買乜呀？即刻醒起一個月前，林奮強話在此時刻，買恒生H股ETF就冇蝕底，總之H股指數升，呢隻ETF就升，唔駛諗買邊隻股票，現在睇番，果然係只要信，不要問。
尋日C醫生殺到，又係一坐低就睇手機睇價位！佢話復活節去完福岡返嚟，因遊客比較少，可以享受清靜愉快假期，吃一級toro壽司，只需380日圓一塊，兌算番大約係25港元，比香港便宜得太多，拜港元升值所賜也，佢嘅朋友選擇咗去京都賞櫻，則後悔莫及矣，因所到之處，皆是遊客，強國人佔多數，到清水寺排隊上山好似打吡大賽之日嘅馬場散場，人潮洶湧，清水寺乃係純木建築，唔知到幾時會被遊客踩冧。
C醫生係資深股市常客，話一返到嚟就賺進不少，直情係好似有人送錢俾佢使咁款。我地笑佢不如呢排在醫務所掛出聲明：「暫停睇症，專注睇市」，會搵得更多真銀。C醫生耍手擰頭：「點得，啲病人會走晒㗎，呢個股市最多會癲多個零月，我間醫務所仲要做多十年八年。」咁係啱嘅，1973年之時，有不少人認為大時代到臨辭咗銀行經理職位，全職炒股，到咗1974年就有唔少人入咗青山，甚或跳樓。
新一代股民不妨以史為鑑。但每一次大牛市來臨，一定有人掟出TTID論（This time is different）（今次係唔同），列舉種種理由話明今次牛市有實質理由支持，唔會爆破崩潰。不過歷史話俾我地聽，時辰一到，次次一樣！