有時啲嘢，咪話唔信邪。無綫前日先至宣佈，下周會重播《大時代》，點知丁蟹都未出動，丁蟹效應已經先行，恒指噚日終於停止「八連升」，全日跌幅達到454點，有網民即刻留言：「丁蟹效應，今次死定了！」唔少網民觀望緊，丁蟹下周正式出動後，個市係咪都會有異動？
咪住，其實今次會連累個市嘅，未必TVB嘅丁蟹喎，因為ATV都重播《世紀之戰》。《世紀之戰》係乜來？咪就係韋家輝2000年為亞視製作嘅《大時代》續集囉，因為版權問題而改名《世紀之戰》，主角仍然係鄭少秋同劉青雲，前者由丁蟹變丁野，後者由方展博變方新俠，都係呢對一出動就令股市有異動嘅組合。
秋官：獲利回吐啫
有網民話台雙劍合璧咁樣谷《大時代》上下集，股民真係走得快好世界，否則個個稍後變晒蟹民就陰功咯。因為丁蟹人心惶惶？等八方講埋先至知驚都未遲。事關喺《大時代》同《世紀之戰》重播之際，周日會有秋官嘅錄影節目出街，而周日嘅金像獎頒獎禮，方展博即係劉青雲好有機會封帝。嘩，呢對股「惑」孖寶係咁出動，股民唔驚變蟹至奇嘞。
八方噚日問過秋官，係咪丁蟹效應搞到股市跌？佢話：「獲利回吐啫，技術性反彈。」笑言股民只要留意啲佢嘅消息，必有斬獲，仲自爆太太官晶華主攻投資賺啲買餸錢。
咁過去幾日股巿急升，老婆有冇加餸？「佢唔捨得放，所以未有（錢）執到，佢貪心」。
李八方
mailto:[email protected]