當國家接二連三有「任務」畀你，點只表面「任務」咁簡單？有心水清政界中人留意到，最近有位新一代「公職王」冒起，接連喺「可持續發展委員會」、「公民教育委員會」到新鮮滾熱辣嘅「創新及科技發展委員會」連中三元，但喺傳媒曝光方面較低調，就係現為香港軟件行業協會會長嘅楊全盛。政圈盛傳中西環都好like佢，估緊佢於明年立法會選舉或於資訊及科技界，上陣撼泛民莫乃光。
阿爺揀蟀年輕化
咪住，建制派唔係盛傳，仲有個洪為民想上陣咩？嗱，花生友都唔會話𠵱家搞緊前海嘅洪為民冇機會嘅，但站喺阿爺立場，培養多個人以備不時之需，點會有蝕底呢？花生友喺政府未畀「任務」楊全盛前，已經聽聞佢有機會獲西環睇中喺明年IT界上陣，而佢最近喺反對創科局拉布呢壇大仗都企得幾前，幾度喺前線拍住業界一齊打仗。
點解阿爺畀like佢？花生友以下所講只係道聽塗說嘅分析，絕對唔係權威消息，包括阿爺都想「戰將」年輕化，以便掌握社會年輕人嘅脈搏，未到40嘅楊全盛正中阿爺下懷；而中西環都谷緊助年輕人創業向上流，本來係「和記隆」潮州餅太子嘅佢放棄印印腳，自行創業，點會唔加分。當然去到最後，都要睇吓阿爺祝福邊一位多啲，但有諸事之徒話，就算楊全盛唔選立法會，都係N屆局長人選，政途無可限量。
花生友