利物浦周一英超迎戰賽前四連敗嘅「喜鵲」紐卡素，靠史達寧同祖阿倫各入一球贏2:0，繼續向第四位嘅曼城進逼。原本利記贏波可喜可賀，但今場入球功臣史達寧，比賽當日被英國《太陽報》揭發佢曾經吸笑氣，繼兩日前被踢爆吸水煙後再做錯事，睇嚟紅軍真係要諗吓同唔同呢位扭計王續約。
開完紀錄單刀又撻Q
由於紅軍排出無鋒陣，經常要靠史達寧由左路高速推入禁區起腳，果然開波只係九分鐘，佢就靠個人膽識，扭過兩名喜鵲守衞後射入，為球隊先開紀錄。領先後嘅紅軍繼續狂攻紐卡素，而史達寧面對嘅，又係近年傷多過踢嘅賴恩泰萊，淨係屈速度都夠晒，但弊在佢射術麻麻，56分鐘，佐敦軒達臣右路傳中，賴恩泰萊想解圍竟大漏，但呢位新星竟然對住個龍門撻Q射斜，結果要到70分鐘，先由祖阿倫喺門前建功，為紅軍鎖定2:0勝局。
羅帥解畫：佢年紀仲細
紅軍贏波後，𠵱家同跌落第四位嘅曼城只係差四分，但與此同時，《太陽報》突然披露獨家消息，上載咗一段史達寧同朋友私底下吸笑氣嘅片。片段中，史達寧好嘆咁攤咗喺張梳化度，仲對住鏡頭儍笑，然後就見佢啜住個橙色氣球，係咁吸俗稱笑氣嘅氧化亞氮，最後就成個人瞓咗喺度，個款好似癮君子咁。
就住呢段片，記者喺賽後記招問領隊羅渣士有咩睇法，一向錫到佢燶嘅羅帥，一開始都有啲變臉，話會捉愛將嚟問話，但講到後尾，都係選擇維護呢位得20歲嘅後生仔：「對於一個有職業操守嘅運動員嚟講，呢樣嘢梗係唔啱，但佢只不過係個細路，年輕人喺呢段時間確實好容易行差踏錯，同埋佢今仗都冇因為咁而分心，仲入咗球靚波，表現好專注。」
古語有云﹕「慈母多敗兒」，我求大俠就勸羅渣士揸正嚟做。佢前兩日嘅吸水煙事件已經搞到一鑊泡，𠵱家又爆多單吸笑氣，近呢幾個月又狂扭計唔肯續約，如果季尾真係傾唔掂數，賣走佢都未必係壞事囉！
識睇，一定係睇足英台【英波Live】：
http://soccer.appledaily.com
http://bit.ly/engballlive