渣打（2888）近年業績轉差後，高層人事變動好似家常便飯，有人走自然有人加入。講國語講到嘞嘞聲嘅前大中華區經濟研究部主管王志浩（Stephen Green）舊年走咗，渣打噚日就宣佈，搵來丁爽替佢個位，終於唔係由外老睇中國經濟嘞。
丁爽曾經喺國際貨幣基金組織（IMF）同埋人行研究部工作，對中國政策特別熟悉。加盟渣打前，佢喺花旗做咗4年中國經濟師，當時向大中華區首席經濟學家沈明高滙報，𠵱家佢跟舊老闆職級相同，應該好高興喇。另外，宏觀經濟研究部環球主管Marios Maratheftis會兼多一職，做首席經濟師。
渣打嘅宏觀經濟研究部其實算係好彩，今年初渣打香港區證券研究部有100名員工被炒，宏觀經濟研究部得以倖存，希望將來士氣好番啲啦。