眨吓眼嚟到四月，雖然馬季七月中先結束，但周三(15日)第六場大告隻「好友星威」，爭勝機會卻大幅減少；如果大家唔善忘，應記得上年6月尾，「好友星威」快放跑第三，表現似乎甚佳，不過隻馬有亁皮症，唔太出汗，當時天氣又太熱，不能散熱下，跑完焦躁不安，未能順利解鞍。由於這已是「好友星威」近季第三次賽後出現類似情況。馬會於是禁止「好友星威」喺四月至十一月 (全年氣溫較高月份) 報名參加任何日間賽事。
咁即係話「好友星威」即日起到今季尾，只能喺夜馬上陣，搵食機會少咗，每次出賽自然要加倍珍惜。睇番呢匹馬上仗喺同程谷草1200米，以極佳走勢殺入亞軍，只輸畀班底較高嘅「萬事盛」一條頸，反映已經回勇。今次由小將呂卓賢換上韋達，亦係利好因素！點解呢？事關練馬師告達理旗下早排有匹廐侶「歡喜」，正係由呂卓賢換上韋達，結果成功連捷。
「好友星威」馬主丁志威同爺爺丁炳星，對愛駒一直不離不棄，話晒呢隻乾皮「阿星」過去三班都贏過，家陣響四班只孭126磅，真係唔好睇低。