以下全屬真實個案，如有雷同，並不巧合。周日柴灣拜山，登山途中身邊孝子賢孫全在談論股市，左一句「𠵱家係咪仲買得㗎？」，右一句「有冇股票仲升呀？畀個名嚟好喎！」，聽得最多「唔係啩，呢隻都得？升咗好多喎！」個個想買想賺想發達，但不信會繼續升。
周一港股越升越有，成交再逾2,600億元，港交所（388）氣勢如虹，單日勁升40元，港府不用再「坐艇」。開市時段在灣仔街頭聽到一中年女士與另一名中年女士（不肯定是否師奶）以專業口吻研究港交所。女士甲說：「無聽你講，無買到港交所！」女士乙笑說：「都話要買㗎啦，𠵱家唔好買啦，升得咁急實回，再買都未遲。」
到昨日，港股跟A股跌，於地鐵車廂聽又到有人講股票。有人問：「今日跌喎，係咪可以買呀？」即時有「專家」回應：「唔好住，恒指RSI仲喺80樓上，今日都係跌得嗰400點，等RSI跌返去70至75，咁就安全㗎喇。」
跟基金朋友分享前述對話，朋友冷笑一聲說：「係得你諗咁多㗎咋，個市癲咪由佢癲囉！」明白。
密西比