長假結束後，好多巴打絲打辦公室都應該有好多日本手信，多數都係草餅、蛋糕仔之類，但費清嘅姚同事就擺支日本威士忌竹鶴17喺枱面，叫大家隊咗佢，「3,000日圓咋，即係200幾港幣」。
支嘢香港炒到成千銀㗎，今時今日，肯攞支日本威士忌嚟與眾同飲都算豪氣㗎，一支難求吖嘛。
#遊客搶細支裝
同事莫探員都啱啱喺日本返嚟，佢話當地機場、旅遊區嘅威士忌已經被洗劫一空，日本威士忌多數係700ml，「但𠵱家啲香港人、內地人，連180ml都唔放過，個個都係咁掃」。好似白州咁，櫃上的180ml裝都所剩無幾（圖）。
不過，喺呢個時候，另一個同事筍魚就施施然咁話，「好難買咩？我買到喎，買咗兩支山崎威士忌。本來都見到山崎2014㗎，賣1.1萬日圓，但係我屋企有，咪唔要囉」。嘩，大庭廣眾放閃，費清好想要副黑超囉。
筍魚話，其實喺一啲街坊式超市，都仲可以買到大熱嘅威士忌，佢就係喺京都四条大宮站附近一間細超市買㗎，嗰度唔算係旅遊旺區，超市都係服務居民，「所以唔使同啲遊客一齊搶」。唔知點解，費清突然間諗起屯門、元朗啲居民……囉。
費清 ＃要生計，也要生活 ＃毋忘初衷