陪伴唔少人成長嘅威威獅令，佢要換新形象嘞。海洋公園今年陸續推出全新形象嘅7隻吉祥物，由薩凡納藝術設計（香港）大學16位學生合力設計而成，園方特別因應未來有新嘅威威天地落成，趁機為威威改新形象。
海洋公園營業及市務執行總監李玲鳳話，威威獅令已經用咗10年，由美國設計師創作，新形象本土化啲，搣甩「獅令」只叫「威威」就可以，但依然用番「船長」角色，新look圓圓哋、收肚腩同雙腳變番條尾。設計團隊代表袁碩蔓指，新設計較有亞洲風格，包括採用簡化線條，體形係二頭身。
其他改良版舊成員包括鯊魚大嘜、海豚樽樽、小熊貓小紅熊、熊貓包包及企鵝德仔，會新增一個美女成員雪狐美雪，小鸚雄、占士鯊、智者龜、大胃鱷同俏魚姬就要退役嘞。國寶級中國大鯢，即係「娃娃魚」，就因為冇被遊客選為最受歡迎動物，無緣成為吉祥物。