鄭希怡（Yumiko）上個星期三喺港安醫院剖腹誕下5.5磅重嘅BB女梁浸浸（乳名）之後，本來佢已經好開心咁喺網上報平安，點知同一日夜半BB女就被發現要放喺氧氣箱、並由爸爸梁學儲陪同下，轉送去東區醫院ICU病房，原來BB女出現肺積水情況，要轉去設備較完善嘅公立醫院醫治。當時剛剛剖腹生產嘅Yumiko因為未能即時出院陪伴愛女，心情一度低落，好彩梁浸浸好叻女，住院至今第8日，經過醫院嘅悉心照料，情況已逐漸好轉。
同親友探囡囡
Yumiko喺上星期六已經出院返屋企坐月，梁浸浸好轉，Yumiko終於鬆一口氣，而且佢都不時同親友去到醫院探望囡囡，原來Yumiko要喺醫院泵人奶畀囡囡，前晚佢就喺微博上載一張拎住奶泵嘅相，佢留言話：「只要妳能健康，我願意。」樽面顯示「鄭列瓊之女」（鄭列瓊為Yumiko原名），母愛真係偉大，Yumiko要加油呀！
撰文：馮仁昭
