港股喪升，帶挈部份人身家暴漲，佳士得今年6月舉行春拍，又拎280個愛馬仕（Hermès）手袋出來拍賣，話唔定吸引一班喺股市獲利嘅人，走去掃番幾個喎。
有錢都未必買到嘅Hermès係唔少女士至愛，佳士得今次將會有一個黑色鱷魚皮鑲鑽Birkin拎出來拍賣，最高估價係150萬元；成功拍賣嘅話，有機會挑戰Hermès手袋嘅拍賣紀錄。據資料，2011年曾經有一個Hermès紅色鱷魚皮Kelly以159萬元成交。
對於近期股市咁牛，會否令客仔手鬆啲，推高手袋成交價呢？佳士得資深副總裁林博明（Matthew Rubinger）就笑一笑，指買袋嘅都係「真正收藏家」，股市上落未必有影響出價。今次拍賣，最平估值嘅Hermès只係7,000元。