立法會「9男女」議員早前去咗德國訪問，為咗多謝德國政府盛情招待，返港後決定回請德國駐港總領事蘭布斯多夫食餐勁，噚日終於成行開餐，但卻有蝦碌事，爭啲冇飯開。
話說佢哋本來相約總領事夫婦以及一位副領事，下晝去中環ifc嘅添好運，諗住畀領事嘆吓地道米芝蓮點心，點知卻擺咗個大烏龍，原來根本冇訂位，連同一位立法會秘書處職員共13人，肚餓點算好？最終佢哋轉戰ifc另一食店正斗，逼埋喺一張細枱密密食。
正斗最出名嘅係雲吞麵，據知總領事都食到舔舔脷；雖然正斗嘅豬手同德國鹹豬手完全唔同style，但總領事依舊回味無窮。
至於總領事另一半最like食乜？據座上客之一嘅民建聯陳克勤話，領事夫人似乎對炸腐皮卷最讚不絕口。同樣有去開餐嘅謝偉俊笑笑口話，訪問德國時食唔到鹹豬手，估唔到返嚟香港之後食番。