發展局局長陳茂波噚日同一班中學生喺深水埗美荷樓分享自己嘅逆境自強故事，喺木屋區長大嘅波叔話當年讀中文中學，被編到成績較差嘅一班，成班同學一齊發憤圖強，要喺公開試吐氣揚眉，又借名校筆記、又喺夜晚爬牆入學校溫書，甚至去到公園喺昏暗環境下讀書，寒窗苦讀終於成班廿幾人一齊考入中文大學。
佢憶述當年為咗幫補家計，夜晚到理工學院教授文憑課程，但當時英文唔太好、校方又要求一定要用英文教，所以逼自己日讀夜讀，連瞓覺發開口夢都係講緊英文，終於練得一口流利雞腸。
佢以此勸免同學，越早發現自己嘅缺點，越能搵方法面對同克服，佢又提醒同學將來工作搵錢之餘，要記住花時間陪屋企人，好似當年佢上咗岸搵到錢後，喺酒樓賣點心嘅媽媽突然發現有腦癌，想佢享吓清福都唔得，十分可惜。